Omelau (the ultimate sacrifice)

By “Mersad Ngirchoteot” —-

ng chimol tekoi el kmal kedeb eng di sel bo dosaod er ngii eng sebeched el kmo ng diak a ulebengelel. ak kekerei el buik e sel kim moruul a bisakng ea ki blecheol melau ordomel el lild lolab a mechut el simbung ma llel a babier el ikel diak dousbech, ngak a blechoel mo ra olchertoll el mo melai leng mle olechui ra blimam. becherei se kuk mo tara taem. ma ki dmul ngii el babier e melau ordomel lousbech er sel nguil el kora diak el sal mekeald ma diak el sal mengchat, sel kora di ngara belngel. e mekekokemam el lomeltii ordomel el morsel kimomdasu er ngii, lotobed ra mo ungil bisakng, el beketaut e locha kmal mo betok a cheldil. meng kelteketel a taem el diak sal lomdasu er tial tekoi el melau, ngak tial klungal chad el mla mo bechiil loungalek ra terung el redil el chimong a teriuch a rekil ma chimong edei rekil, e kol mocha medengelii a kuk tara belkul tial tekoi. ea kumdasu e tiang a lmuut el betok a usbechel ma belkul el kmal di kau a sebechem el metik er ngii e ousbech er ngii. e ngak a kuk mo melasem lomeskid a usbechel el ngak omes er ngii ra chelsel a klengar rengak ma beluulchad el dengara chelsel. me kumuchel lomes ra beluad, chelechal taem eng uai a lengara ringel daob ra betok longarm ma chelbuul ra klechad, betok a duubech luchul a kerreior ma dakd lomerk ra rrau reng ra beluu. me ke de kora mo diak dodengei el kmo ke de bedul ker a lebebil ra taem. e mo kaiuechib osenged ra betok el tekoi, ma remerredeled a mo diak el sal bleketakl meng mengal rullid el mo suebek a rengud. a rebebil a kmu sesei ma rebebil a kmu sesei, ma debeltid eng kuk bebil. a rekaidelengelangel ma rekadederecher ra teliang. ma rekuk di lukong el rengud ngmla merasm a ngerir. ma rebebil el diak bol luk a ngerir el rengud toked a matmatong. 

a kora mo omdasu er tial cheldechedechal a Uab el de blechoel lousbech er ngii lomekesiu a tekoi ma teletael ra klechad. ngak a dirrek el blechoel lousbech ra belkul sel kumes ra klungiolel a tekoi, “a uchul eng klou a beluad ng Uab el milseseb”, meng locha merang, e ngak a diak kudengei el kmo tiang klemerang a lechub. sera kekerei ea remeklou el chad a mengedecheduch el uaisei, ma kimngara skuul meng llechukl a cheldechdechal el kmeed losisiu. meng keleng meral mle cheldecheduch el uaisei ra irechar, alechub eng uai a llach el luldelid ra rechuodel el tara ikal llechud a rechad er Belau, likel di ngara ngor ma uldasu luldelid ra klemengetel a taem el me lmuut er chelechang el de ngara oluches ma babier. e ngak a mla tibir ra renguk ma uldesuek el uasei a tekinged a ikel rokui el dodengei ma duldengei ma mla mo diak dodengei ma dirkak bododengei a di mo ruebet ra eungel tial tekoi el ‘melau’ ma lechub eng ‘omelau’. diak sal sebechek lochotii malechub ak luchesii a kedeb e bleketakl lomesodel, mak bai di mousbech ra uldesuek e melasem el ua kungedecheduch el chelid lomeketakl ra usbechel el ngak omes er ngii. me sel kot el tmuu ra bteluk a di uai a omokodir a ngelkem el mo melenget a belsem. ng kora mo kmeed ra chedaol llechukl ra bibilia, a rubak el dios luldureklii a di tal betik ra rengul el ngelekel el mera beluul chad el mo kedul a kengtid ma belsed. me sel kumdasu er chelechal taem eng locha diak a chad el kongei el mekodir ngkel kot el betik ra rengul ngelekel el mo mengkad a belsel. ma dirrek el llach er chelechal taem a diak el kengei ra uaisei el tekoi. me ngak sel kumtab e tial cheldechedechal a Uab a diak el meral dilubch el tekoi. ng uai a cheldecheduch el chelid lolecholt ra beltik el reng ra rechad ra ngara mong el taem el kmal mle meringel er tir a rullii a kmung ngerang engdi uai a lulemdasu ra mo ungil ra betok lechad ra uriul taem. tulemdasu er kid er chelchal taem ma beluulchad el kid a ngara chelsel. e sei a kisang el ngaruchei el beltik el reng, “lomelau” el rebeldeked a kiltmeklii lochotii a beltik el reng er tir el merkid ma beluad.

a lebebil eng diak domdasu leng dirkak a tal de ngara chelsel, malechub eng dirkak a tal bo dodengelii a ringelel leng dirkak el duubech el mrkid ra chelsel a klengar er kid. meng diak dolechesuar, eng di ulekum ng kuk tal duubech el morkau e kau a locha mo telkib el choremii a ringelel. ng uangerang sel lemad a ngelkem, ngdelam, ngdemam, ng tarkau, ngkel kot el betik ra rengum ra klengar rekau. seikid a locha di tal rolel e ke mo medengei el kmo uangerang a kmal belkul a beltik el reng el kodall a ulebengelel. a kmal mo melechesuar a renguk ra kuk di klechad er ngak, leng dimlak sal medengelii a belkul a beltik el reng, e mekerang a doubeltik el reng. a kuluusbech el kmo a beltik el reng a mora remodil, el diak el sechal ra tekoi ra kelsechal ma klechiibelau. a sechal chad er Belau a chad ra mekemad, chad ra klakoad, chad ra chei, chad ra redil el betok a rebechil ma rengelkel berriid ra rael. eng di sera kkot el mo melechesuar a beltik el reng, malechub e keleng sebched el kmo a kumechelang el ‘melau’ ra renguk, eng sera kot el moungalek. ma kmal mle semeriar eng di dimlak sal medengei el kmo ngera meral rolel a doubeltik el reng el mora ngelked. meng mle uai a le kekerei el kleald lomelau el dimlak sal melechesuar eng di millemolem el mora le medei a demak, el moch ra delak el milechellak. el mocha terung a rengelkek, e kuk medei a delak el mechas. meng melemolem el ngau el kekerei el diak el sal meringel ma diak el sal mengchat eng di ngomerollel a taem eng mocha melemalt el uai tial lordomel el lild. mocha melemalt el mocha sebechel rodemii a beketaut e betok a cheldil el biskang. e dimlak dil ngak el melau erngii, tirkel rokui el chad ra chelsel a klengar rengak el me lmuut er chelechal taem a kmal kuureng a sulir leng uai a lulengeseu er ngak lomeklemalt el melau er tial renguk ma uldesuek ra klengar ma klechad er ngak el chad er tial beluulchad. mak soak el nguu tial techall e oureng a sulir a rokui el chad er Belau, a remklou el mo lmuut ra remekekerei el kmo kom dirrek el kmal mesulang. a ikel kuk omelau ra klechad er kemiu lak mobes louchais el mei me bo de kaodengei e de kaingeseu lomeklemalt. ,,,mng.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: